Australia planifikon të bëjë që kompanitë e mediave sociale të marrin pëlqimin prindëror për përdoruesit nën moshën 16 vjeç dhe po kërcënon me gjoba deri në 10 milionë dollarë australianë (7.5 milionë dollarë) për platformat e internetit që nuk respektojnë këtë gjë, sipas projektligjit të botuar të hënën.

Sipas mediave të huaja, përcjell Telegrafi, kompanitë e mediave sociale, të cilat përfshijnë forume anonime si Reddit dhe aplikacione takimesh me smartphone si Bumble, do t’u kërkohet gjithashtu të ndërmarrin të gjitha hapat e arsyeshëm për të përcaktuar moshat e përdoruesve dhe për t’u dhënë përparësi interesave të fëmijëve kur mbledhin të dhëna, tha Projektligji i Privatësisë Online.

Rregullat e reja të propozuara do ta vendosin Australinë ndër vendet më të rrepta për sa i përket kontrolleve të moshës për mediat sociale dhe do të bazohen në përpjekjet për të frenuar fuqinë e Big Tech, pas pagesave të detyrueshme të licencimit për mediat dhe planet për të ashpërsuar ligjet kundër keqinformimit në internet dhe shpifjes.

Facebook këtë muaj u përball me zemërimin e ligjvënësve amerikanë pasi një ish-punonjës i kompanisë dhe sinjalizues i dorëzoi mijëra dokumente hetuesve të Kongresit mes shqetësimeve se kompania kishte dëmtuar shëndetin mendor të fëmijëve dhe kishte nxitur ndarjet shoqërore – një zhvillim i cituar nga ligjvënësit australianë të hënën.

“Ne po sigurojmë që të dhënat dhe privatësia [australianëve] do të mbrohen dhe trajtohen me kujdes”, tha në një deklaratë Prokurorja e Përgjithshme, Michaelia Cash.

“Projekt-ligjet tona do të thotë që këto kompani do të ndëshkohen rëndë nëse nuk e përmbushin atë standard”, shtoi ajo.

Ndërkohë ndihmësministri për Shëndetin Mendor dhe Parandalimin e Vetëvrasjeve, David Coleman tha se “rrjedhja e hulumtimit të brendshëm të Facebook-ut tregon ndikimin që platformat e mediave sociale mund të kenë në imazhin e trupit dhe shëndetin mendor të të rinjve”. /Telegrafi/