Kompania e njohur ruse që merret me modifikimin e veturave, TopCar, deri tani ka prezantuar shumë paketa për Mercedes GLE dhe GLE Coupe, ndërsa tani sjellë edhe një tjetër paketë të re për këtë model.
Fjala është për paketën e quajtur “TopCar Inferno” dhe është e dedikuar për modelin Mercedes-AMG GLE 63 S, të cilit i jep një pamje më “agresive”, transmeton Koha.net.
Paketa e re, ndër të tjera, përfshinë eksterierin me ngjyrë vjollce, mbrojtësit anësorë të zgjeruar, mbrojtësit e rinj, spoiler të përparmë, kofanon nga fibra të karbonit, maskën e përparme me logon “TopCar”, set pragjesh të reja, difuzer të pasmë, spoiler mbi bagazh, etj.
Natyrisht, kjo nuk është e tëra sepse pronari i një modeli të tillë mund të marrë edhe setin e ri të rrotave prej 22-inç, sistemin e frenave karbon-keramik, sistemin sportiv të shkarkimit të gazrave si dhe amortizatorët e modifikuar.
Sa i përket interierit, TopCar ka zgjedhur lëkurën më cilësore (mund të jetë edhe me ngjyrë vjollce si në foto), elemente nga fibra të karbonit, tepihët “Inferno” dhe pedalet nga alumini.
