E premtja e 21 korrikut ka qenë me një bilanc tragjik për vendin tonë. Brenda një dite, 11 qytetarë kanë humbur jetën. Mes tyre kishte edhe minorenë, siç ndodhi në tragjedinë e liqenit të Banjës ku humbi jetën babai me dy djemtë dhe nipin.
E para që humbi jetën dhe u raportua nga policia ishte një 70-vjeçare në Durrës. Ajo ndërroi jetë pasi ra në kontakt me korrentin.
Pasdite në Himarë u regjistrua një aksident i rëndë. 40-vjeçari Renato Bushi ka humbur jetën pasi makina të cilën ai drejtonte doli nga rruga.
Orët e vona të darkës do të pasonin me të tjera viktima. Një 58-vjeçar humbi jetën pasi u përplas nga makina në rrugën Elbasan-Peqin. Viktima në momentin e ngjarjes ishte duke lëvizur me një karrocë kali.
Pas këtij aksidenti, policia do të raportonte për ngjarjen më të rëndë. 4 persona u nxorën të pajetë nga liqeni i Banjës në Gramsh. Bëhet fjalë për Arben Zogun, rreth 46 vjeç, dy djemtë e tij, Rubens Zogu 19 vjeç dhe Esti Zogu 14 vjeç, si dhe kushëriri e tyre Melis Zogu, 20 vjeç. Ata u futën për t’u larë në liqen, por nuk mundën të dilnin dot. Buzë liqenit u gjetën dy motoçikleta, tre celularë dhe rrobat e trupit që u përkisnin viktimave.
Por sërish tragjeditë do të vijonin. Kësaj here në Tiranë. Pak para se të mbyllej e premtja, uniformat blu njoftuan për një aksident në fshatin Fortuzaj. Një 26-vjeçar i quajtur Brusild Gjyla humbi jetën pasi Range Rover-i ku udhëtonte ra në humnerë. Shoku i tij, Denis Çali, 33 vjeç mbeti i plagosur dhe u dërgua në spital. Por këtë të shtunë, policia njoftoi se edhe ai humbi jetën pas dëmtimeve të rënda nga ai aksident.
