Të paktën 92 palestinezë u vranë dhe 130 të tjerë u plagosën në 24 orët e fundit derisa Izraeli vazhdon sulmet në Rripin e Gazës së rrethuar, transmeton Anadolu.
“Okupacioni izraelit kreu nëntë masakra kundër familjeve në Rripin e Gazës, duke lënë 92 martirë dhe 130 të plagosur gjatë 24 orëve të fundit. Shumë njerëz janë ende të bllokuar nën rrënoja dhe në rrugë pasi shpëtimtarët nuk janë në gjendje t’i arrijnë ata”, tha Ministria e Shëndetësisë me bazë në Gaza.
Duke shpërfillur vendin e përkohshëm të Gjykatës Ndërkombëtare të Drejtësisë, Izraeli vazhdon sulmet në Rripin e Gazës, ku të paktën 31.645 palestinezë janë vrarë, kryesisht gra dhe fëmijë, si dhe 73.676 të tjerë janë plagosur që nga 7 tetori.
Izraeli ka goditur Rripin e Gazës që nga sulmi ndërkufitar i Hamasit, në të cilin Tel Aviv thotë se u vranë afër 1.200 njerëz.
Sipas Kombeve të Bashkuara (OKB), lufta izraelite ka shkaktuar zhvendosjen e brendshme të 85 për qind të popullsisë së Gazës mes një bllokade të shumicës së ushqimeve, ujit të pastër dhe ilaçeve. Po ashtu 60 për qind e infrastrukturës së enklavës është dëmtuar ose shkatërruar.
Izraeli akuzohet për gjenocid në Gjykatën Ndërkombëtare të Drejtësisë, e cila në një vendim të përkohshëm në muajin janar urdhëroi Tel Avivin të sigurojë që forcat e tij të mos kryejnë akte gjenocidi dhe të garantojë që ndihma humanitare të ofrohet për civilët në Gaza.
Armiqësitë kanë vazhduar të pandërprera, megjithatë, dhe dërgesat e ndihmave mbeten mjerisht të pamjaftueshme për të trajtuar katastrofën humanitare.
