Nëse marrin dëmshpërblim nga shteti, 11 të dënuarit nga rasti “Sopoti”, për 15 vjetët sa kanë qenë të privuar nga liria, pritet të marrin nga 100 mijë euro vetëm nga ndalesa fizike, sepse u është pamundësuar të punojnë.
Kështu thonë avokatët e ish-të burgosurve të cilët që nga marsi i vitit 2003 vuajtën dënimin nën akuzën për “terrorizëm”, ku ndërruan jetë 2 ushtarë të NATO-s dhe një shtetas i Maqedonisë, njofton TV21.
Avokati Naser Raufi thotë se dëmshpërblimi duhet të jetë më i madh për shkak të torturës psikike dhe vuajtjes ditore, për ta dhe familjet e tyre.
Por, ish të burgosurit thonë se me asgjë nuk mund të kompensohet dëmi i tyre real.
“Na i shkatërruan familjet. Juve gazetarëve dhe avokatëve ju falënderohemi pasi na keni ndihmuar, por kjo nuk paguhet me asgjë. Unë dhe Sulejman Sulejmani 9 vite kemi qenë në burg shtëpiak dhe 7 vite në burgun e Idrizovës. Kjo nuk paguhet me asgjë”, thotë Samet Ljutfiu.
Rastin “Sopoti” e mori në shqyrtim Prokuroria Speciale, pasi që kishte biseda të përgjuara nga ish-ministrja e Brendshme Gordana Jankullovska dhe ish-shefi i DKS-së, Sasho Mijallkov.
