Sekretari i Përgjithshëm i Lidhjes Demokratike të Kosovës, njëherësh deputet i Kuvendit të Kosovës, Ismet Beqiri, ka reaguar për çmimin prej pesë eurosh të vendosur nga Qeveria e Shqipërisë për një drejtim, për këdo që kalon me veturë nëpër Rrugën e Kombit.
Nëpërmjet një shkrimi në Facebook, Beqiri këtë e ka quajtur si një vendim jo të mençur e të dëmshëm nga qeveria shqiptare e Edi Ramës.
Sipas tij, taksa në Rrugën e Kombit përbën ndëshkim për kosovarët.
Shkrimi i plotë i tij:
Të dashur miq
Edhe një veprim dhe vendim jo i mençur e i dëmshëm nga Qeveria Shqiptare.
A po ndëshkohemi ne shqiptarët, shtetasit e Kosovës për dashurinë që kemi për Shqipërinë?
A po ndëshkohemi për vizitat tona të shpeshta, jo vetëm gjatë sezonit turistik, por gjatë gjithë vitit?
A po ndëshkohemi që përkundër standardit tonë të ulët, qytetarët tonë i shpenzojnë gjithë ato para në Shqipëri?
A po ndëshkohemi me një taksë të tillë sa të panevojshme, por edhe shumë të lartë?
A po ndëshkohemi thuajse qytetarët e Kosovës po shfrytëzojnë një rrugë të standardeve të BE-së?
A po ndëshkohen bizneset nga Kosova?
A skuqeni ndonjëherë ?nuk besoj, sepse për me u skuq duhet pasur fytyrë…
I.Beqiri
