“Nuk mund dot ju të bllokoni asgjë dhe të pengoni asgjë dhe për më tepër pastaj , jo po…shiko këtu se do ngrihen këta, do ngrihen ata…Kjo e ngritjes është: “Thirri thirri të ngrihet, ai shkreti kokëulur , s’të përgjigjet dot”, – tha kreu i qeverisë në seancën plenare të 29 marsit në Kuvendin e Shqipërisë.Por nuk kaloi shumë dhe të shtunën, populli u ngrit në protestë kundër taksës së dyfishtë që qeveria vendosi pa paralajmërim për kalimin e ço automjeti në Rrugën e Kombit.
Këtë të mërkurë, grupi parlamentar i LSI-së i është drejtuar me një kërkesë zyrtare kryetarit të Kuvendit Gramoz Ruçi, për të kërkuar përjashtimin e shefit të mazhorancës.
Arsyetimi është i tillë: Gjuhë fyese, rrugaçi, poshtëruese dhe përçmuese ndaj shqiptarëve.
“Krahasimi që kryeministri Edi Rama ju bën deputetëve dhe qytetarëve shqiptarë me organin gjenital mashkullor është rast i paprecedentë dhe shfaqja më e shëmtuar e qëndrimit të tij ndaj popullit”, thuhet në kërkesën e LSI-së.
LSI thekson se nuk është hera e parë që kryeministri bën sjellje të tilla në kundërshtim me rregulloren, dhe për këtë kërkohet masa më e rëndë që parashikon rregullorja. Dënimi maksimal, është 10 ditë përjashtim nga punimet e Kuvendit.
