“Jemi kalimtar në këtë rrugë të quajtur jetë. Shoku im, vëllau im Seat Ajruli në këtë rrugë la shumë gjurmë. Inshallah takohemi ne Xhennet be vlla”, ka shkruar ministri i kulturës në Republikën e Maqedonisë, Asaf Ademi lidhur me vdekjen e humanistit, Sead Ajruli.
Ajruli nuk u mbijetoi lëndimeve të marra nga një aksident rrugor që ndodhi më 15 gusht në Greqi. Që nga ajo ditë, Ajruli mbahej nën përkujdesje intensive mjekësore në spitalet greke, për t’u transferuar më pas në Stamboll.
Sead Ajruli lindi më 17 dhjetor të vitit 1974 në fshatin Kamjan të rrethinës së Tetovës. Shkollimin e mesëm e ndoqi në medresenë “Isa Beu” në Shkup në vitet 1989-1993, për të vazhduar pastaj studimet në Arabinë Saudite, në fakultetin “Al-Imam” në Riad, të cilin e përfundoi në vitin 2005. Pas përfundimit të studimeve, u kthye në vendlindje për të filluar kontributin e tij për vendin dhe shoqërinë.
Së bashku me teologë dhe shokë të tjerë, ai u aktivizua në Shoqatën Kulturore “Vizioni M”, ku jepte kontributin e tij të çmuar në edukimin e gjeneratave të reja. Ajruli njashtu ishte i inkuadruar edhe në aktivitetet humanitare të Organizatës Kulturore Humanitare “Merhamet”, duke u shtrirë dorën skamnorëve dhe nevojtarëve të rajonit të Pollogut dhe më gjerë. Përgjatë kësaj periudhe Sead Ajruli kreu edhe studimet e magjistraturës në Universitetin Shtetëror të Tetovës, duke marrë titullin: “Magjistër i Gjuhës dhe Letërsisë Arabe”.
Në memoriet e nxënësve të tij, banorëve të fshatit Kamjan, por edhe të gjithë atyre që patën rastin ta njohin, Sead Ajruli gjithnjë do të mbetet shembull dhe burim frymëzimi, një njeri i devotshëm, por edhe i sinqertë, i përkushtuar në punë por edhe gazmor, pishtar ndriçues dhe kundërshtar i përbetuar i çfarëdolloj padrejtësie.
