Qeveria Haradinaj po tenton që në një formë të fshehtë të gllabërojë Telekomin e Kosovës. Kështu tha anëtari i Lëvizjes Vetëvendosje, Fatban Bunjaku në një konferencë për media.
“Të premten me një dalje publike kryeministri i Kosovës Ramush Haradinaj na tha se gjendja në Telekomin e Kosovës është shumë e rëndë dhe që vetëm mrekullia e kthen. Situata në Telekom nuk është edhe aq e errët sa e sheh kryeministri Haradinaj”,ka thënë Bunjaku, raporton Koha Ditore.
Sipas tij, Telekomi nuk po bankroton por ka një përpjekje për t’u rënduar financiarisht.
“Kryeministri ka punësuar militantë partiakë dhe jo profesionistë për ta shkatërruar Telekomin dhe ta privatizojë”, ka thënë më tej ai.
