Gjykata Themelore në Gjilan ka dënuar me 41 vjet burgim shtatë persona të akuzuar për krim të organizuar dhe shitblerje të marihuanës.
Ata kishin fshehur drogën nëpër tavolina e dërrasa me qëllim transportin në Evropën Perëndimore dhe në Turqi përmes Maqedonisë së Veriut.
Të dënuarit janë: A. L., R. H., F. G., F. A., G. A., F. S. dhe Z. B.
“Të akuzuarit janë fajtor, sepse nga muaji shkurt 2017 deri më 30.04.2017, me dashje kanë marr pjesë në veprimtarinë kriminale të grupit të organizuar, duke u marr me blerjen, transportin dhe shitjen e paautorizuar të narkotikëve të llojit “marihuanë”, të cilën e kanë paketuar dhe fshehur nëpër tavolina dhe dërrasa, që pastaj të transportojnë në shtetet e Evropës Perëndimore dhe në Turqi përmes Maqedonisë së Veriut”, thuhet në njoftimin e Themelores në Gjilan.
Pas hetimeve, në shtëpinë e të akuzuarit A.L. në Sojevë të Ferizajt, ishin gjetur 500 kilogramë narkotikë, të vendosur dhe fshehur në 20 tavolina.
Në shtëpinë e R.H. në Bibaj të Ferizajt ishin gjetur 28 kilogramë narkotikë të fshehura në 64 pako të dërrasave, ndërsa tek i akuzuari F. G. në Krushë të Madhe janë gjetur 184.39 kilogramë të llojit marihuanë, të fshehura në 10 tavolina të mëdha dhe 4 tavolina të vogla.
Gjykata ka thënë se me këto veprime të akuzuarit kanë kryer veprat penale “pjesëmarrja ose organizimi i grupit kriminal të organizuar” dhe “blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”.
Të akuzuarit F. A., G. A., F. S., Z. B. janë shpall fajtor për veprën penale “dhënia e ndihmës kryerësve pas kryerjes së veprës penale”, ndërsa i akuzuari L. N. është liruar nga akuza.
Dënimet janë këto:
I akuzuari A. L. është gjykuar me 11 (njëmbëdhjetë) vjet burgim dhe dënim me gjobë në shumën prej 50.000 euro gjobë.
I akuzuari R. H. është gjykuar me 11(njëmbëdhjetë) vjet burgim dhe 50.000 euro gjobë.
I akuzuari F. G., është gjykuar me dënim prej 8 (tetë) vjet burgim dhe 20.000 euro gjobë.
I akuzuari F. A. është dënuar me 4 (katër) vjet burgim dhe 10.000 euro gjobë.
I akuzuari G. A. është gjykuar me 4 (katër) vjet burgim dhe 5.000 euro gjobë.
I akuzuari F. S. është gjykuar me 2 (dy) vjet burgim.
I akuzuari Z. B. është dënuar me 1(një) vit burgim.
Gjykata ka nxjerrë aktvendim për të akuzuarit A. L., R. H. dhe F. G., të cilëve do t’iu vazhdohet masa e paraburgimit deri në plotfuqishmërinë e aktgjykimit, ndërkohë të akuzuarit G. A. i ndërpritet masa e paraburgimit.
Palët kanë të drejtën e ankesës ndaj këtij vendimi në Gjykatën e Apelit.
