Sot kryetari i Alternativës, Afrim Gashi, ishte në vizitë zyrtare në selinë e Lëvizjes VETËVENDOSJE në Prishtinë, ku u prit nga kryetari i saj Albin Kurti.
Me këtë rast kryetari Gashi e uroi kryeministrin e ardhshëm të Kosovës për fitoren e zgjedhjeve të 6 tetorit, duke shprehur optimizëm që sa më shpejt të konsolidohen institucionet e Kosovës dhe kjo do të jetë në dobi të qytetarëve të saj.
Albin Kurti, nga ana e tij, e falënderoi Afrim Gashin për vizitën dhe shprehu optimizëm se qeveria e re e Kosovës do të jetë një vlerë e shtuar edhe për komunikimin ndërshtetëror mes Kosovës dhe Maqedonisë së Veriut, si edhe shqiptarëve në këtë shtet.
Në takim ishin edhe anëtari i Kryesisë Qendrore të Alternativës, Zeqirija Ibrahimi, dhe nënkryetari i Vetëvendosjes, Glauk Konjufca.
