Shqipëria është udhëheqësja rajonale me popullsinë më të pakënaqur me mënyrën sesi po ecin gjërat në ekonominë e tyre. Barometri i Ballkanit një publikim i Këshillit për Bashkëpunim Rajonal bën me dije se pjesa më e madhe e vendeve të rajonit kanë shënuar një rritje të numrit të atyre që shprehen të kënaqur, një tregues i fortë se efektet e rritjes në ekonomi po përkthehen në përfitim edhe për qytetarët por e kundërta ka ndodhur me vendin tonë.
“Shqipëria është liderja rajonale në përqindje të atyre që janë të palumtur plot 42 për qind e popullatës teksa në Kosovë më pak se një çerek apo 23 për qind e të anketuarve janë të pakënaqur duke e kthyer këtë në rajonin më të kënaqur ekonomikisht” thuhet në publikim.
Sa i takon situatës financiarë në 12 muajt në vazhdim 18 për qind e shqiptarëve presin që të jetë më keq ndërsa 54 për qind nuk presin asnjë ndryshim. Më mirë e presin 25 për qind e të anketuarve.
Në Mal të Zi qytetarët janë të shqetësuar nga papunësia në 55 për qind ndërsa në Shqipëri situate ekonomike është ajo që shqetëson 53 për qind. Çështjet politike janë ato që shqetësojnë Kosovën me 16 për qind dhe Shqipërinë me 15 për qind. Korrupsioni në Shqipëri shihet vlerësohet si shqetësim në 33 për qind të të anketuarve.
Barometri tregon se të paktën për Shqipërinë ka ndryshuar disi stereotipi sa i takon frikës. Në një prej pyetjeve të anketës e cila specifikon se kur mendoni për Ballkanin Perëndimor çfarë ndjenje ju vjen në mendje vetëm 5 për qind e të anketuarve janë përgjigjur me “frikë”. Kjo është përqindja më e ulët e kësaj përgjigje në gjithë rajonin teksa Serbia ka përqindjen më të lartë në këtë përgjigje me 26 për qind. 38 për qind janë përgjigjur lidhur me Shqipërinë se ju vjen në mendje “shpresa” dhe 28 për qind besimi. Vetëm 16 për qind janë përgjigjur me “dyshim”./Monitor
© SYRI.net
