Kryeministri i Kosovës, Albin Kurti, ka thënë se që nga takimi i parë i tij me presidentin serb, Aleksandar Vuçiq, në kuadër të dialogut me Serbinë, Kosova më s’është objekt në tavolinë, por subjekt në karrige.
Në një intervistë në televizionin publik, Kurti ka përsëritur se dialogun s’e ka në top tri prioritetet.
“S’kam thënë që është prioriteti im i shtatë. Kam thënë që në matjet e popullit është 5-6-7, por kam thënë se po bëj kompromis dhe është prioriteti i katërt. Besoni se ashtu është. Më shumë jam marrë me pandeminë, koordinim të ministrave, me çështjet ekonomike e të drejtësisë. Merrem edhe me dialogun dhe përkushtimi im është që kryeministri zëvendësin e tij ia ka dhënë në portofol edhe dialogun. Është i rëndësishëm, por s’është në top-tri prioritetet”, ka deklaruar ai.
Kurti më tej ka thënë se teksa dialogu ka burim Rezolutën e Asamblesë së Përgjithshme të OKB-së e me fokus në bashkëpunim e paqe dhe stabilitet, ai ka “degjeneruar duke gërryer substancën shtetërore me koncesione të panumërta të bëra në emër të njohjes në fund, e që e demantoi president serb ditë më parë”.
Kurti ka deklaruar se duhet të ndryshohet taktika e dialogut e që më Serbisë “të mos i hidhet mish”.
“Duke i hedhur më shumë mish s’mund të presësh që tigri të bëhet vegjetarian”, ka shtuar ai.
