Kryetari i Komunës së Strugës, Ziadin Sela, dha dorëheqjen nga posti i tij. Sela e njoftoi dorëheqjen në mbledhjen e Këshillit të Komunës, ku konfirmoi se do të bëhet deputet.
Në vend të tij vjen Mustafa Zabzun. Sela, kryetar i Lëvizjes për Reforma – PDSH ka deklaruar se nuk do të futet në qeveri me Nikolla Gruevskin për të cilin thotë se e ka quajtur “indian” dhe që së bashku me Ali Ahmetin i sjellin dy-tre inspektorë çdo ditë në Komunën e Strugës.
“Unë do të kushtëzoj qeverinë që do ta krijojë Zoran Zaev. I kam humbur zgjedhjet dhe për këtë nuk mundem ta bëj të gjithë platformën”, tha Sela.
Pak ditë më parë pas takimit të liderëve shqiptarë të inicuar nga Ali Ahmeti i BDI-së, Sela doli me një propozim konkret për zgjidhjen e koalicionit qeveritar me kushtet e shqiptarëve që sipas tij duhet të jenë: gjuha shqipe e barabartë me atë maqedonase, buxhet i drejtë, decentralizim i mirëfilltë, dhe zgjidhje e proceseve të montuara politike.
Sela ka qenë deputet i PDSH gjatë viteve 2011-2013.
