Zbardhet vjedhja e 200 mln lekëve në një supermarket në Sarandë, ndërsa uniformat blu kanë bërë të ditur se kanë arrestuar dy autorët e dyshuar të grabitjes.
Uniformat blu bëjnë me dije se në pranga kanë rënë shtetasit me iniciale E.D. 40-vjeç banues në Lezhë, dhe 37-vjeçarime iniciale B.C. banues në Sarandë.
37-vjeçari, ka qenë i punësuar si teknik kamerash sigurie në këtë supermarket. Nëpërmjet telefonit të tij, ai ka monitoruar të gjitha lëvizjet në këtë subjekt, si dhe shumën e parave që ndodheshin aty.
40-vjeçari E.D. rezulton i dënuar më parë në Itali për vjedhje dhe sulm ndaj forcave të policisë.
Më tej, policia njofton se nga kontrollet e ushtruara në banesat e të arrestuarve, janë sekuestruar në cilësinë e provës materiale një shumë e konsiderueshme parash.
Më konkretisht janë sekuestruar 400 mijë lekë të reja, 2500 dollarë amerikan, 1000 paund, 2 automjete, 4 telefona celularë dhe 3 pajisje DVR dhe dy laptopë.
Njoftimi i policisë:
Zbardhet dhe dokumentohet vjedhja e një shume të konsiderueshme parash, më datë 11.12.2021, në një supermarket në Sarandë. Finalizohet me sukses operacioni policor i koduar “Fundviti”, për goditjen e veprimtarisë kriminale në fushën e vjedhjes së pronës dhe pasurisë.
Operacioni i zhvilluar nga shërbimet e Komisariatit të Policisë Sarandë, në bashkëpunim me Drejtorinë Vendore të Policisë Vlorë dhe Drejtorinë Vendore të Policisë Lezhë.
Vihen në pranga 2 shtetas. Sekuestrohen shumat 400.000 lekë, 2500 dollarë dhe 1000 paund, 2 automjetet me të cilat janë larguar autorët pas ngjarjes, 4 telefona celular, 3 pajisje DVR dhe 2 laptop.
Shërbimet e Komisariatit të Policisë Sarandë, në bashkëpunim me Drejtorinë Vendore të Policisë Vlorë dhe Drejtorinë Vendore të Policisë Lezhë, nën drejtimin e Prokurorisë Pranë Gjykatës së Shkallës së Parë Sarandë, në vijim të punës për parandalimin e vjedhjeve, zbardhjen e atyre të ndodhura më parë dhe vënien e autorëve para përgjegjësisë ligjore, pas një pune të mirëfilltë hetimore, organizuan dhe finalizuan me sukses operacionin “Fundviti”, në kuadër të të cilit u vunë në pranga shtetasit:
- D.(Gj.), 40 vjeç, banues në Tale, Lezhë, i dënuar më parë në Itali, për “Vjedhje” dhe “Dhunë/sulm ndaj forcave të policisë”;
- C., 37 vjeç, banues në Sarandë. Nga veprimet hetimore dyshohet se këta shtetas, në bashkëpunim me njëri-tjetrin, kanë vjedhur një sasi të konsiderueshme parash, në një supermarket në lagjen nr.4, në Sarandë, më datë 11.12.2021.
Shtetasi B. C. ka qenë i punësuar si teknik i kamerave të sigurisë në këtë supermarket dhe nëpërmjet telefonit të tij ka kontrolluar shumën e parave që gjendeshin në ambientet e këtij subjekti.
Në cilësinë e provës materiale janë sekuestruar shumat 400.000 lekë të rinj, 2500 dollarë amerikan, 1000 paund britanik, 2 automjete me të cilat autorët janë larguar pas ngjarjes, 4 telefona celular, 3 pajisje DVR dhe 2 laptop.
Materialet i kaluan Prokurorisë pranë Gjykatës së Shkallës së Parë Sarandë, për veprime të mëtejshme, për veprën penale “Vjedhja” kryer në bashkëpunim.
