Shefja e Politikës së Jashtme dhe e Sigurisë e BE-së, Federica Mogherini, angazhohet personalisht në sqarimin e incidentit të fundit midis Kosovës dhe Serbisë.
Kjo është bërë e ditur në takimin që Mogherini zhvilloi të hënën në Barcelonë me ministrin e Punëve të Jashtme të Shqipërisë, Ditmir Bushati, gjatë një takimi të ministrave të jashtëm të vendeve të Bashkimit për Mesdheun, që po mbahet në Barcelonë të Spanjës, shkruan sot “Koha Ditore”.
Ndërkohë që shefi i diplomacisë shqiptare, Bushati, e ka cilësuar provokimin e fundit që Serbia bëri në adresë të Kosovës si një rikthim të konfliktit midis dy vendeve.
Në takimin me znj. Mogherini ministri Bushati garantoi gjithashtu se Shqipëria mbetet e vendosur për një rajon të sigurt, ku proceset demokratike shtetkonsoliduese të vijojnë pa u keqpërdorur nga aktorë të tretë, duke nënkuptuar këtu sidomos incidentin e fundit të provokuar nga Serbia me nisjen e trenit drejt Kosovës.
Koha.net
