Gjiganti rus energjetik Gazprom, nga sot e mërkurë 27/04 pezullon furnizimin me gaz për Bullgarinë dhe Poloninë, siç njoftuan të martën mbrëma ministritë kompetente të dy vendeve, duke theksuar se janë përgatitur për këtë.
“Më 26 prill 2022, Gazprom informoi PGNiG për qëllimin e tij për të pezulluar plotësisht furnizimet sipas kontratës (tubacioni Yamal) (…) më 27 prill”, tha kompania shtetërore polake në një njoftim për shtyp. Furnizimi me energji i Polonisë është i sigurt, siguroi Ministrja e Klimës dhe Mjedisit, Anna Moskva, duke theksuar se “nuk do të ketë mungesë gazi në shtëpitë polake”. “Që nga dita e parë e luftës ne kemi deklaruar se jemi gati për pavarësi të plotë nga lëndët e para ruse”, shtoi ai.
Flukset nga burime të tjera do të zëvendësojnë furnizimet e Gazprom, tha ministri i Polonisë për Sigurinë e Energjisë Piotr Naimsky, duke shtuar se kontrata për tubacionin Yamal do të skadonte gjithsesi në dhjetor.
Pak orë më vonë, Ministria Bullgare e Energjisë njoftoi se Gazprom kishte njoftuar kompaninë shtetërore bullgare të shpërndarjes së gazit Bulgargaz për pezullimin e furnizimit me gaz nga sot e mërkurë.
Ministria bullgare thotë se ka ndërmarrë hapa për të gjetur alternativa ndaj furnizimeve me gaz dhe për të menaxhuar situatën. Ajo thekson se në këtë fazë nuk ka kufizime për konsumin e gazit në Bullgari, e cila mbulon më shumë se 90% të nevojave të saj me importe nga Gazprom.
Presidenti rus Vladimir Putin u ka bërë thirrje vendeve që ai i përshkruan si “jomiqësore” që të bien dakord për një plan për të hapur llogari me Gazprombank për pagesat për gazin rus, me këtë të fundit që të marrë përsipër të konvertojë monedhën në rubla.
I forti i Kremlinit kishte kërcënuar se do të mbyllte “rubinetin” e gazit në rast se kërkesat e tij nuk plotësoheshin plotësisht.
“Procesi i ri i pagesës me dy faza i propozuar nga Rusia nuk është në përputhje me marrëveshjen ekzistuese deri në fund të këtij viti dhe mbart rreziqe të konsiderueshme për Bullgarinë, duke përfshirë kryerjen e pagesave pa marrë asnjë furnizim me gaz nga pala ruse”, Ministria e Energjisë së Bullgarisë./GSH
