Paraqitjet e shkëlqyeshme të këtij fillim-sezoni e kanë rritur dukshëm vlerën e kartonit të Vedat Muriqit.
Mallorca ua ka bërë të qartë ndërmjetësuesve të saj: do ta shiste përfaqësuesin kosovar vetëm për 40 milionë euro
Vedat Muriqi është bërë njëri prej yjeve të La Ligas.
Futbollisti kosovar po shkëlqen në fanellën e Mallorcas këtë fillim-sezoni.
28 vjeçari i ka realizuar 6 gola nga 10 sa i ka shënuar krejt ekipi, më saktësisht 60 për qind të golave.
Ai madje është golashënuesi i katërt më i mirë në kampionatin spanjoll, duke i lënë prapa yjet si Benzema, Griezmann, Morata e Cavani.
E kjo ka bërë që edhe vlera e kartonit të futbollistit prizrenas të rritet.
Sipas mediave spanjolle, respektivisht portalit “futboldesdemallorca”, Mallorca e ka bërë të qartë kërkesën fikse për lojtarin.
Klubi spanjoll e ka rritur së fundmi klauzolën e shkëputjes së kontratës me Muriqin.
Për ish-futbollistin e Lazios, klubi ishullor i kërkon hiç më pak se 40 milionë euro.
Drejtuesit e Mallorcas ua kanë bërë me dije ndërmjetësuesve s’e s’do të hiqnin dorë nga “Pirati” për një shumë më të ulët se kjo.
Mallorca synon ta mbajë ish-futbollistin e Rizesporit dhe Fenerbahçes për një kohë të gjatë, përcjell Gazeta Express.
Por, një ofertë e parefuzueshme do të bënte që drejtuesit e klubit t’i ngrisnin duart lart.
Mbetet të shihet nëse do të arrijnë oferta për Muriqin gjatë janarit apo në verën tjetër.
Përfaqësuesi kosovar nga ana e tij ndihet mjaft rehat në Mallorca, por futbollit nuk i dihet kurrë.
