Ekspozita me piktura e Edi Ramës në Hong Kong në vitin 2015, dyshohet se ka marrë sponsorizime të paligjshme nga kompani kineze, të lidhura me ish-këshilltarin e tij Dorian Duçka. Ndonëse kreu i qeverisë nuk ka bërë asnjëherë transparence mbi sponsporizimin e ekspozitës, faktet tregojnë se ai ka përfituar personalisht, edhe pse ligji e ndalon që zyrtarët e lartë të marrin dhurata e favore
Në nëntor 2015, kryeministri Edi Rama ndau me ndjekësit e tij në rrjete sociale kënaqësinë për hapjen e një ekspozite vetjake me piktura në Hong Kong, ku gjendej për takime me biznesin e vendit të pasur aziatik.
Kompania e parë ishte CEFC Energy Company, e cila më pas solli përfaqësuesit e saj në Shqipëri, nëpërmjet këshilltarit pa pagesë të Ramës, Dorian Duçka, i cili ishte edhe rrogëtar në atë shoqëri private kineze.
Sponsori i dytë ishte një rrjet dyqanesh antikuaresh në Hong Kong, e quajtur “Akademia Kineze e Kulturës”.
Kryeministri Rama nuk ka bërë asnjëherë publike të dhënat mbi sponsorizimin për ekspozitën, që mbi të gjitha, ishte tërësisht në përfitim të tij personal.
Ligji “Për parandalimin e konfliktit të interesave” ndalon zyrtarët e lartë që të marrin dhurata, favore apo trajtime preferenciale në mënyrë direkt apo indirekte, të cilat i jepen për shkak të pozicionit të tij, nga një individ, person fizik ose juridik privat.
Rama ishte në Hong Kong për shkak të pozitës zyrtare si kryeministër. Ndaj, favori që dy kompanitë aziatike i kanë bërë atij për ekspozitën ishte për shkak të funksionit të tij dhe jo për aftësi të spikatura botërore në artin e pikturës.
Është e paqartë nëse ai e ka deklaruar këtë dhurim në formë sponsorizimi nga dy kompanitë e huaja, por ajo që duket e sigurt është se ekspozita e Ramës duhet të ketë kushtuar shumë, nisur nga fakti se Hong Kongu është një prej vendeve më të pasura dhe me standard ekonomik më të lartë në botë.
SYRI TV konsultoi të dhënat e deklaratës së pasurisë të kryeministrit Edi Rama për vitin 2015. Në formular ai deklaron se ka krijuar rreth 26 milionë lekë të vjetra nga shitja e librit “Kurban” dhe veprave artistike, pa i specifikuar se si dhe ku janë shitur pikturat e tij.
Ndërkohë, në pjesën publike të deklaratës së pasurisë nuk përmendet sponsorizimi që ai ka përfituar për ekspozitën në Hong Kong.
Në rastet kur zyrtarë nuk deklarojnë dhuratat apo trajtimet favorizuese, kryejnë veprën penale të “fshehjes së pasurisë”.
© SYRI.net
