Asamblistët e Komunës së Mitrovicës së Veriut miratuan sot kërkesën për hapjen për qarkullim të urës kryesore mbi lumin Ibër.
Në mbledhjen e Kuvendit Komunal të Mitrovicës së Veriut ishte vetëm një asamblist serb, Dushan Millunoviç i cili votoi kundër kërkesës për hapjen për qarkullim të urës mbi Ibër.
Propozimi u bë nga Aida Ferati-Doli dhe vendimi u votua me 11 vota pro, 1 abstenim, dhe 1 votë kundër, asamblisti Millunoviç nga komuniteti serb
Nga Qeveria e Kosovës ende nuk janë prononcuar për këtë vendim të autoriteteve lokale të Mitrovicës së Veriut ndërkohë që lista serbe, – partia kryesore e serbëve në Kosovë – dënoi vendimin e asamblistëve të Mitrovicës së Veriut dhe e konsideroi atë si “si të paligjshëm”.
Nga kjo parti theksuan se ky vendim “shkel marrëveshjet e Brukselit dhe kërcënon drejtpërdrejt paqen”.
“Duam të paralajmërojmë se hapja eventuale e urës padyshim që do të rezultojë me incidente në këtë zonë, gjë që duket se është edhe qëllimi i Prishtinës. Ura, ku kanë ndodhur më shumë se 1.000 sulme me motive etnike nga jugu në veri, është simbol i vuajtjes së popullit serb dhe synimi i Prishtinës është që dëbojë serbët e mbetur nga i vetmi mjedis urban ku ata kanë mbijetuar në një numër më të madh”, thuhet në reagimin e kësaj partie që ka mbështetjen e Beogradit, citon REL.
Lista Serbe kërkoi nga KFOR-i (misioni paqeruajtës i NATO-s në Kosovë), EULEX-i (misioni i BE-së për Sundim të Ligjit në Kosovë) dhe përfaqësuesit e bashkësisë ndërkombëtare që “me urgjencë të pengojnë zbatimin e këtij vendimi”.
Zyra për Kosovën në Qeverinë Serbe tha se kryeministri i Kosovës, “Albin Kurti, sot pa dyshim ka treguar se dëshiron dhe ëndërron luftë, dhe do që i gjithë veriu i Kosovës të hyjë në konflikt”.
“Për këtë ai përdor përfaqësuesit dhe asmblistët jolegjitimë në veri të Kosovës dhe Metohisë. Për këtë vendim votuan 11 asamblistë nga Prishtina, një abstenoi dhe një ishte kundër”, thuhet në njoftim.
Drejtori i kësaj zyreje, Petar Petkoviç, tha se ka njoftuar të gjithë përfaqësuesit ndërkombëtarë, si dhe ndërmjetësin e dialogut, Mirosllav Lajçak, duke shtuar se ai pret nga ta që ta “qetësojnë Kurtin”.
Reagon dhe Vuçiç
Duke reaguar pas vendimit për kërkesën për hapjen e urës mbi lumin Ibër, presidenti i Serbisë, Aleksandar Vuçiç, tha se kryeministri i Kosovës, Albin Kurti, dëshiron “të largojë serbët” nga Kosova, duke shtuar se udhëheqësi kosovar “dëshiron konflikte me çdo kusht”.
Vuçiç nuk dha asnjë provë për këto pretendime por theksoi se me vendimin për hapjen e urës, shqiptarët “duan të marrin” edhe Mitrovicën e Veriut.
“Kjo është ideja e tyre e kamotshme, që për vite me radhë populli ynë e ka kundërshtuar”, tha ai.
Ura e Ibrit
Mitrovica e Veriut është një nga katër komunat në veri të Kosovës, që banohen me shumicë serbe.
Pas luftës së fundit në Kosovë, ura mbi lumin Ibër e ndau Mitrovicën në dy pjesë, në atë jugore me shumicë shqiptare, dhe në pjesë veriore, të banuar me shumicë serbe. Sot, ato janë dy komuna të veçanta.
Gjashtëmbëdhjetë asamblistët e kësaj komune u zëvendësuan dhjetorin e vitit të kaluar, pasi asamblistët paraprakë dhanë dorëheqje, si pjesë e largimit kolektiv të serbëve nga institucionet e Kosovës në veri, në shenjë proteste me vendimin e Prishtinës për riregjistrimin e makinave me targa serbe në ato të Kosovës.
Ura mbi lumin Ibër apo “rivitalizimi i urës” ka qenë temë e dialogut mes Kosovës dhe Serbisë për normalizimin e raporteve, që ndërmjetësohet nga Bashkimi Evropian. Palët kishin rënë dakord që ura të ishte e hapur për qarkullim. Por, në praktikë kjo nuk ndodhi kurrë dhe vetëm njëra anë u hap për këmbësorët.
Në Bruksel, Kurti dhe Vuçiç do të takohen më 2 maj në kuadër të dialogut që ndërmjetësohet nga blloku evropian. Zyrtarët evropianë kanë konfirmuar se në këtë takim pritet të miratohet Deklarata për të pagjeturit dhe do të paraqitet drafti i parë i statutit për themelimin e Asociacionit të komunave me shumicë serbe./rtsh.al/
