Gazetar: Adrian Kerimi
Televizioni Tellma në kuadër të emisionit KOD ka zbuluar rrjetin e bizneseve që lidhen me familjen e kreut të BDI-së Ali Ahmeti. Kompani ndërtimi, kompani energjetike dhe aksione në kompani prodhimi. Pas blerjes së Qendrës Tregtare Soravia nga nipi i Ahmetit, Drin Ahmeti, KOD ka zbuluar rrjetin e kompanive me vlera milionëshe të dhëndrit të Ahmetit, Kushtrim Smajlaj përfshi edhe miqtë e djalit të Ahmetit, Shkumbin Ahmeti.
Sipas KOD, kompania AS SENJAK është në pronësi të Selaudin Arifit, respektivisht babai i të fejuarës së Shkumbin Ahmetit.
Në këtë kompani, para se Drin Ahmeti të blinte Soravian, kishte hedhur një shumë të parave përmes kompanisë së sapo hapur THOR e cila bashkërisht me kompanitë në konzorcium bleu qendrën tregtare në zemër të Shkupit.
Salaudin Arifi në cilësinë e biznesmenit lokal i cili në pronësi ka pasur disa shitore për ushqim dhe pije në Kërçovë, rezulton pronar i kompanisë AS SENJAK e themeluar vite më parë me adresë në Kërçovë. Vitin e kaluar në emër të tij është themeluar kompania NOVA AGRO INVEST SHKUP. Kjo kompani në korrik të vitit kaluar ka blerë afër 10 për qind të aksioneve në kombinatin “Pellagonia”, sh.a Manastir. Për faktin se dy kompani të tjera PELLAGONIA ENERXHI dhe ZDRAVJE RADOVO ndodhen nën pronësi të kombinatit, Arifi rezulton të ketë pjesë pronësore edhe në këto dy kompani. Ai gjithashtu në vitin 2013 ka blerë 18 për qind të aksioneve në fabrikën e famshme të çokollatave në Shkup, EVROPA. Në maj të vitit 2021, AS SENJAK e vjehrrit të Shkumbin Ahmetit ka blerë 9 për qind të aksioneve në ZHITO POLLOG Tetovë. Përmes prokurimeve publike mund të vërehet se kompania AS SENJAK ka marr disa tenderë në komuna të ndryshme për ndërtime të vogla si në Kërçovë, Prilep, Dibër, Makedonski Brod, Krivogashtani etj. Në shtator të vitit 2020 AS SENJAK ka fituar tenderë në vlerë prej gjysmë milioni euro për rikonstruim të rrugëve në Komunë e Kërçovës. Në maj të vitit pasues ka siguruar tenderë në vlerë mbi gjysmë milioni euro për ndërtimin e një shkolle, ndërsa paraprakisht ka siguruar tenderë me vlera më të vogla, përkatësisht meremetimin e rrugëve lokale në Kërçovë.
KOD ka hulumtuar edhe si vetura e vlerës gjysmë milion euro Rolls Roys Phantom ka përfunduar nga pronësia e djalit të ish deputetit rom, Hamdi Bajram në pronësi të vëllait të Salaudin Arifit, Lulezim Arifi pronar i kompanisë DUKLA. Sipas hulumtimit, kompani në pronësi të familjes Ahmeti ndodhen në të njëjtat objekte dhe adresa të kompanive të deputetit të BDI-së, Ismail Jahoski në Shkup dhe jo vetëm. /Alsat.mk
