Forcat izraelite kanë arrestuar 55 palestinezë në Bregun Perëndimor dhe Kudsin Lindor, sipas burimeve zyrtare, raporton Anadolu.
“Forcat izraelite ndërmorën operacione arrestimi në rajone të ndryshme të Kudsit Lindor të pushtuar dhe Bregut Perëndimor”, tha Emani Serahine për Anadolu, një zyrtar i Shoqatës së të Burgosurve Palestinezë.
Serahine deklaroi se “55 palestinezë u arrestuan nga forcat izraelite gjatë këtyre operacioneve”.
Autoritetet izraelite deri më tani nuk janë përgjigjur ndaj raportimeve.
Në një përshkallëzim dramatik të tensioneve në Lindjen e Mesme, forcat izraelite kanë nisur një fushatë të ashpër dhe të fuqishme ushtarake kundër Rripit të Gazës, si përgjigje ndaj ofensivës ushtarake të grupit palestinez Hamas në territoret izraelite. Grupi tha se operacioni ishte në përgjigje të sulmeve izraelite në kompleksin e Xhamisë Al-Aksa në Kudsin Lindor të pushtuar dhe dhunës së shtuar mes kolonëve.
Në përgjigje të veprimeve të Hamasit, ushtria izraelite nisi operacionin “Shpata e Hekurt” kundër objektivave të Hamasit brenda Rripit të Gazës. Përgjigja e Izraelit është shtrirë në ndërprerjen e furnizimit me ujë dhe energji elektrike në Gaza, duke përkeqësuar më tej kushtet e jetesës në një zonë që është përfshirë nga një rrethim total që nga viti 2007.
