Përplasjet e fundit ndërmjet liderit të LDK-së, dhe njëherësh kryeministrit të vendit, Isa Mustafa me deputetin Shpejtim Bulliqi, për çështjen e demarkacionit me Malin e Zi, kanë nxitur edhe reagimet e strukturave të kësaj partie.
Njëri nga delegatët e Kuvendit Qendror të LDK-së, dhe njëherësh kryetari i nëndegës së LDK-së në Prishtinë, Petrit Bicaj i ka dalë në mbrojtje publike deputetit Bulliqi, pas sulmeve që sot i bëri Isa Mustafa, raporton Gazeta Blic.
Bicaj u ka bërë thirrje edhe njerëzve tjerë në këtë parti që t’i dalin në mbrojtjes kauzës së drejtë për demarkacionin.
Në anën tjetër, deputeti i LDK-së, Fatmir Rexhepi ka reaguar shumë ashpër pas deklaratave të Mustafës se kush nuk e voton Demarkacionin, nuk ka vend në LDK.
Rexhepi i ka thënë Gazetës Blic se askush nuk mund ta largojë atë nga partia, e as Isa Mustafa. Madje, sipas tij, Mustafa nuk ka kreditë të flas për këtë çështje.
“Unë që 27 vjet jam në LDK, kam 27 vjet që fitoj besimin e elektoratit. Unë kundërshtoj fuqishëm çdo deklaratë, pavarësisht a ështe e partisë apo e kujdo qoftë. S’ka nevojë me na qu selam përmes kërkujt. Secili duhet të shoh gabimet e veta, edhe ku janë premtimet që i kanë dhënë ne 2014, ku janë tash, secili duhet të jap llogari dhe askush s’mund të më largojë, pasi që jam që 27 vjet aty”, tha ai për Gazetën Blic.
