Gjykata Themelore Penale liroi nga akuzat ish deputeten e VMRO DPMNE-së Silvana Boneva për lëndën “Drumarina”. Ish deputetja Boneva u akuzua nga Prokuroria Speciale Publike për veprën penale “mashtrim në shërbim”.
Sipas akuzës të PSP-së, Boneva si deputete në periudhën nga viti 2011 deri në vitin 2015 ka manipuluar me shpenzimet e rrugës që i ka paguar sikur të udhëtonte nga Strumica edhepse ka jetuar në Shkup.
Prokurorët vlerësojnë se në mënyrë të jashtëligjshme i janë paguar mbi 100 mijë euro, me çka ka treguar fatura të rreme dhe llogari nga pikat e pagesës rrugore.
Por Gjykata sot solli vendim jofuqiplotë pasi Prokuroria nuk e ka dëshmuar veprën për të cilën ngarkohet e akuzuara.
Në të njëjtën kohë, Gjykata, vendosi t’i ndërpresë masën e përkohshme, ndalesë të tjetërsimit dhe vendosjen në hipotekë të pasurisë së paluajtshme në emër të të akuzuarës dhe familjes së saj.
