Në diskutimin e parë për këtë vit për Kosovën në Këshillin e Sigurimit të OKB’së, presidenti i Serbisë, Tomislav Nikoliq në fjalimin e tij duke iu referuar rastit të Ramush Haradinajt, i cili aktualisht është i ndaluar në Francë, sipas një kërkese të Serbisë të bërë nëpërmjet Interpolit, ka thënë se Haradinaj po e kërcënon me luftë Serbinë. Ndaj deklaratave të presidentit serb ka reaguar lideri i AAK’së, Ramush Haradinaj.
Haradinaj ka thënë se Nikoliq po e kërcenon Kosovën me luftë e jo Ramush Haradinaj Serbinë. Sipas kreut të AAK’së, Tomisllav Nikoliqi, ka qenë ai që para pak kohe, ka deklaruar se është i gatshëm që bashkë me djemtë e tij, të shkojë në Kosovë për të luftuar.
“Ata le të rrijnë në vendin e tyre e ta lënë Kosovën rahat e të mos i bijnë në qafë as asaj e as mua!. Unë e kam mbrojtur vendin tim dhe gjithmonë do ta mbroj dhe këtë mund ta marrin “kërcënim me luftë” vetëm ata që janë të sëmurë si ky farë Nikoliqi”, ka shkruar Haradinaj në rrjetin social Facebook.
Postimi i plotë i Haradinajt:
Tomisllav Nikoliq po e kërcënon Kosovën me luftë, e jo Ramush Haradinaj Serbinë
Nikoliq paska kërkuar në Këshillin e Sigurimit që Bota të marrë qëndrim ndaj meje, sepse unë e paskam kërcënuar Serbinë me luftë!
Tomisllav Nikoliqi, ka qenë ai që para pak kohe, ka deklaruar se është i gatshëm që bashkë me djemtë e tij, të shkojë në Kosovë për të luftuar!
A mos paska kujtuar ky Zotnija se ne do ta presim me lule?!
E kam thënë dhe gjithmonë do ta përsëris, se kushdo që i fut duart në Kosovë, do ta marrë të njejtën përgjigje si Millosheviqi në vitin 1998-1999!
Ata le të rrijnë në vendin e tyre e ta lënë Kosovën rahat e të mos i bijnë në qafë as asaj e as mua!
Unë e kam mbrojtur vendin tim dhe gjithmonë do ta mbroj dhe këtë mund ta marrin “kërcënim me luftë” vetëm ata që janë të sëmurë si ky farë Nikoliqi.
Ai, së pari duhet të tregojë se ku janë varrezat masive me shqiptarë në Serbi, që ende i mbanë sekret e tu kërkojnë falje shqiptarëve për krimet e Serbisë në Kosovë, e jo të merret me retorikë boshe!
