Kisha Ortodokse ka reaguar mbi rezultatet e CENS 2023, teksa shprehet se përqindja e numrit të besimtarëve të tyre që është paraqitur nga ky anketim i bërë për popullsinë, nuk paraqet realitetin.
Institucioni fetar përmes një deklarate për media, shkruan se ka evidencë të dokumentuar se një numër i madh besimtarësh nuk janë intervistuar, e kjo për shkak se nuk janë vizituar nga asnjë regjistrues.
Gjithashtu, Kisha Ortodokse shprehet se regjistrat e pagëzimeve tregojnë numër më të lartë besimtarësh se sa ajo që është publikuar nga CENS 2023.
Reagimi:
Rezultati i Censit 2023, në lidhje me përqindjen e numrit të të krishterëve orthodhoksë, nuk pasqyron në të vërtetë realitetin. Kjo ka ndodhur për disa arsye, ndër të cilat do të përmendim disa:
Regjistruesit, në shumë raste, nuk i pyesnin të intervistuarit për përkatësinë fetare.
Kemi evidencë të dokumentuar se një numër i madh besimtarësh nuk u intervistuan, sepse nuk u vizituan nga asnjë regjistrues.
Sipas regjistrave tanë të pagëzimeve tregohet qartë se numri i të krishterëve orthodhoksë është shumë herë më i madh nga sa rezulton në Cens.
Sipas statistikës së vitit 1927 kemi këto të dhëna: myslimanët sunitë dhe bektashinj përbënin 67.5%; orthodhoksët 22.3% dhe katolikët 10%.
Ndonëse pyetja për besimin fetar ishte fakultative, numri i madh i besimtarëve të pacilësuar prej 332 155, të ateistëve 85 311, të atyre që preferuan të mos i përgjigjen 244 331 dhe të atyre që nuk ishin të disponueshëm 134 451 – në total 796 248 – afërsisht 1/3 e popullsisë, dëshmon për pasaktësinë e këtij Censi.
Zyra e Shtypit e Kryepiskopatës
