Arben Fetai, zëvendëskryeministri për politikë dhe qeverisje të mirë, reagoi pas marrëveshjes me anëtarin e Këshillit të Prokurorëve Publikë dhe ish-avokatin e popullit, Ixhet Memeti, i cili e pranoi fajësinë dhe u pajtua me Prokurorinë Themelore Publike për ndjekjen e krimit të organizuar dhe korrupsionit, e udhëhequr nga Islam Abazi.
Memeti u pajtua për një dënim me kusht prej një viti burg dhe ndalim për ushtrimin e profesionit, veprimtarisë ose detyrës së zyrtarit publik për një periudhë prej tre vitesh për veprën penale “marrja e shpërblimit për ndikim të paligjshëm”.
Ai theksoi se “prokurori i BDI-së, Islam Abazi, kërkoi një dënim me kusht prej 1 viti për prokurorin tjetër të BDI-së, Ixhet Memeti, i cili u kap duke marrë një ryshfet prej 10,000 eurosh për të ndikuar në uljen e dënimit të një politikani të akuzuar për trafik droge.”
Ndër të tjera, Fetai tha se këto raste tregojnë “nevojën për reforma rrënjësore, ku nuk do të ketë më vend për prokurorë të tillë”.
“Prandaj jemi në një situatë ku vetëm 2 për qind e qytetarëve kanë besim në sistemin e drejtësisë. Prokuroria dhe gjyqësori kanë nevojë për reforma rrënjësore, veting dhe një fillim të ri, ku nuk do të ketë më vend për prokurorë të tillë, të korruptuar dhe të ndikuar nga politika dhe kartelet e drogës,” tha Fetai.
