Osmani: Deklaratat e zëdhënësit të BE-së janë raciste, Serbia nuk ka çka pyetet për Urën e Ibrit

Presidentja e vendit, Vjosa Osmani ka thënë se nuk duhet të ketë dialog me Serbinë për çështjen e hapjes së Urës së Ibrit.

Osmani tha se nuk ka çka pyetet Serbia për një urë brenda territorit të Kosovës, shkruan gazeta online Reporteri.net.

Osmani i ka quajtur raciste deklaratat e zëdhënësit të BE-së, teksa shtoi se çdo diskutim me Serbinë në Bruksel për hapjen e urës së Ibrit do të ishte kundërkueshtetuese.

“Sa i përket deklaratave të zëdhënësit të BE-së, deklaratat e tij janë mbi të gjitha raciste. Kështu që as nuk besoj që meritojnë më shumë vëmendje nga ana e ime. Unë jam deklaruar në raport me deklaratat e tyre raciste. Nuk ka asnjë arsye dhe kundërshtoj në çdo mënyrë diskutimin e hapjes së Urës së Ibrit në Bruksel. Nuk kemi çka e pyesim Serbinë, njësoj sikurse ky zëdhënësi më duket është nga Sllovakia që nuk e pyet asnjë nga fqinjët për urat në shtetin e tij. Pra nuk ka çka pyetet Serbia për një urë në Kosovë. Dialog për këtë çështje me Serbinë, nuk do të duhej të pranonte askush, do të ishte kundërkushtetues dhe kundër sovranitetit të shteti tonë”, tha Osmani pra mediave.

Osmani ka thënë se se asnjëherë nuk ka pranuar ndonjë kërkesë nga Shtetet e Bashkuara të Amerikës që të mos hapet për qarkullim Ura e Ibrit.

Por, shefja e shtetit ka potencuar se Kosova nuk ka arsye që të futet në konflikt me aleatët tanë. Ajo tha se ura duhet të hapet, por duhet të përzgjidhet momenti që kur të hapet, të mbahet e tillë e të mos mbetet vetëm “sukses i momentit”.

Osmani tha se SHBA-të e duan urën të hapur, por plani i zbatimit duhet të bëhet bashkë. /Reporteri.net/