Policia e Shtetit ka paralajmëruar qytetarët që të kenë kujdes me aplikacionin e lojërave “Plinko”, pasi po përdoret si një skemë mashtrimi për përfitimin e shumave monetare.
Përmes një njoftimi, blutë theksojnë se aplikacioni reklamohet në rrjete sociale përmes videove ku shfaqen persona të famshëm teksa luajnë në këtë lojë, por që në fakt është mashtrim.
Ofruesit e lojërave kërkojnë të dhënat personale dhe ato bankare, në mënyrë që të përvetësojnë të gjitha këto informacione.
Uniformat blu apelon të gjithë prindërit që të tregohen të kujdesshëm për të mos lëjuar fëmijët të luajnë me këtë aplikacion.
Policia e Shtetit
❗️Apel për kujdes gjatë përdorimit të aplikacionit “PLINKO”❌
Kohët e fundit, në rrjetet sociale po reklamohen lojëra nëpërmjet të cilave fitohen para.
Për ta bërë të besueshme, përdoren videot e njerëzve të famshëm që luajnë këtë lojë, gjë që në fakt është mashtrim.
Ofruesit e lojërave kërkojnë numrat e llogarive bankare. Kjo është një skemë për marrjen e të dhënave të llogarive bankare, nga të cilat mund t’iu merren shuma monetare.
Nisur nga rastet e shtuara të përdorimit të këtij aplikacioni, kryesisht nga nxënësit, me qëllimin për të fituar para, Policia e Shtetit apelon për prindërit që të tregohen të kujdesshëm, për të mos lejuar fëmijët që të përdorin këtë aplikacion dhe në rastet kur ata e përdorin, të tregojnë kujdes, pasi duke dhënë të dhëna personale dhe të llogarive bankare, mund t’iu tërhiqen para nga llogaria juaj.
❌MOS JEPNI TË DHENA PERSONALE!
❌MOS JEPNI TË DHËNA TË LLOGARIVE BANKARE!
