Duke komentuar letrat e dërguara nga kreu i BDI-së drejtuar faktorit ndërkombëtar dhe kreut të Qeverisë, Hristijan Mickoski, deputeti i VLEN-it, Halil Snopçe e pyeti Ahmetin se pse derisa ishin në pushtet asnjëherë nuk ka dërguar letra të tilla edhe pse siç thekson, shqiptarët kanë qenë në gjendje shumë më të vështirë. Ndërkohë deputeti i BDI-së Ilir Hasani, thotë se të gjitha të arriturat e deritanishme janë bërë me shumë mund dhe çështjet që kanë ngelur në gjysmë, janë pjesë e një procesi afatgjatë.
“Nuk është në rregull të dërgosh letër vetëm kur je në opozitë. Ka pasur shumë fenomene dhe shumë ndodhi në të kaluarën gjatë pushtetit mbi 20-vjeçar të BDI-së në këtë shtet ku kanë ndodhur skandale të llojeve të ndryshme dhe ngjarje shumë negative për shqiptarët dhe nuk kemi parë në të kaluarën që Ahmeti të dërgojë një letër të tillë dhe të brengoset seriozisht për ato ndodhi, për gjithë ato vrasje, burgosje, inskenime, montime politike e kështu me radhë”, tha Halil Snopçe, VLEN.
“Për 20 vjet, kemi hequr të zinjtë e ullirit që t’i drejtojmë gjërat dalëngadalë. Ky është një proces, nuk është një ditë që do të vendoset për çështje as të gjuhës as të flamurit e as të përfaqësimit të drejtë të shqitparëve. Mund i madh është bërë që të gjitha këto të rregullohen dhe kemi arritur në fazën kur duheshte një shtytje e vogël që të përfundojnë të gjitha gjërat”, u shpreh Ilir Hasani, BDI. /Alsat.mk
