Deputetja e PD-së, Jorida Tabaku është shprehur se qeveria shqiptare ka dështuar në përmirësimin e kushteve të jetesës për pensionistët.
Tabaku theksoi se pensionistët janë shtresa më e varfër e popullsisë dhe vuajnë nga politikat e qeverisë që, sipas saj, i kanë lënë ata në harresë.
Gjithashtu ajo thekson se të moshuarit po përballen me një rritje të shpejtë të kostos së jetesës pa mbështetje të mjaftueshme financiare.
Tabaku denoncoi përpjekjet e qeverisë për t’u takuar me pensionistët gjatë javës së fundit si “propagandë të zbrazët,” e cila, sipas saj, nuk mbulon realitetin e vështirësive me të cilat përballen të moshuarit.
Ajo kritikoi shpenzimet e qeverisë për projekte luksoze dhe kontrata publike-private, ndërsa fondet për pensionet mbeten minimaliste dhe të pamjaftueshme për një jetë me dinjitet.
Sipas deputetes demorkate, qeveria ka zgjedhur që përparësitë e saj të shkojnë në xhepat e një pakice të privilegjuar, duke lënë pensionistët në varfëri. Demokratja përmendi gjithashtu statistika të frikshme për varfërinë ekstreme, duke theksuar se 22% e pensionistëve shqiptarë janë në rrezik të skajshëm varfërie—një tregues i qartë, sipas saj, i dështimit të reformës së vitit 2015 për pensionet.
Tabaku bëri thirrje për një reformë të vërtetë të sistemit të pensioneve, që të vendosë interesat e qytetarëve në plan të parë, të ndalojë korrupsionin dhe të krijojë një sistem të qëndrueshëm e të drejtë. Ajo përfundoi mesazhin e saj duke theksuar se pensionistët meritojnë më shumë se sa fjalë të bukura dhe premtime boshe—ata meritojnë një jetë të denjë dhe respekt për kontributin e tyre të çmuar në ndërtimin e vendit.
