Rreth 24 orë i janë dashur policisë së Tiranës të hedhë dritë mbi panikun që shkaktoi një telefonatë e një vajze, e cila pretendohej se po dhunohej në një apartament në katin e tetë në zonën e “Astirit”.
Në ndihmë të skuadrave policore u desh të shkonte RENEA, pasi vajza nuk hapte dot derën e banesës ku qëndronte, ndërkohë që hyrja brenda u bë nga ballkoni, ku forcat speciale u detyruan të zbrisnin nga tarraca e ndërtesës.
Vajza është shoqëruar në polici, por në kontrollin e ushtruar në dy apartamente të marra me qira ditore janë gjendur armë, kokainë dhe shish alkooli. Policia ka mundur të zbulojë shpejt se vajza kishte qenë në praninë e të tjerëve, ndërkohë që është zbuluar se ajo ishte kyçur brenda për shkak se ka qenë në gjendje jo të mirë.
Personat e tjerë, që mendohet të jenë 5 djem e dy vajza kanë qenë në kafenenë poshtë, ndërsa vajza i ka thënë policisë se ajo ishte me të dashurin e saj. Pasi është identifikuar ky person, policia tha se bëhet fjalë për Joni Sadikajn nga Tepelena, kohë më parë i akuzuar si pjesëmarrës në trafikun e 1.3 tonë drogë.
Vajza. S.Q., 21 vjeç nga Elbasani, fillimisht ka pretenduar se është marrë peng dhe dhunuar, por më pas ka thënë se është trembur kur është zgjuar dhe ka parë armët në tavolinë. Policia mohon që ajo të ishte e dhunuar, ndërkohë që janë shpallur në kërkim i dashuri i saj dhe 4 miqtë e tij.
Djemtë janë larguar sapo kanë pikasur policinë që kishte rrethuar zonën, duke lënë në mëshirë të fatit edhe armët. Dy pistoletat janë sekuestruar dhe janë dorëzuar në laboratorin kriminalistik për t`iu nënshtruar ekspertimit.
Dje policia publikoi edhe pamjet nga operacioni brenda dy apartamenteve, ndërsa bëhet me dije se vajza pas disa orësh ka pranuar se kishte ardhur me dëshirën e saj të kalonte një mbrëmje me miqtë e të dashurit të saj. Policia dhe grupi hetimor po punojnë për kapjen e të kërkuarve dhe për zbardhjen e rrethanave të plota të ngjarjes.
