Ministria e Mbrojtjes ka dalë me një njoftim zyrtar lidhur me gjendjen pas shembjes së digës së hidrocentralit në Bunec të Himarës.
Ministria bën me dije se në momentin e shembjes ka pasur rreth 15 mijë metra kub ujë, duke shkaktuar prezencë të ujit dhe baltës në 12 biznese në Bunec, si dhe dëmtimin e bazës ushqimore të blegtorisë në 2 familje.
Sakaq, aksi i rrugës nacionale Bunec-Piqeras është i kalueshëm dhe po punohet për pastrimin e baltës.
Probleme në njerëz sipas ministrisë nuk ka.
Njoftimi i Ministrisë së Mbrojtjes:
Rreth orës 12:26 të ditës së sotme ujëmbledhësi i Sasajt, në Bunec, bashkia Himarë, i cili është ndërtuar në vitin 2010 ka pësuar shembje. Në momentin e shembjes ka patur rreth 15.000 metra kub ujë. Si pasojë ka prezencë uji dhe balte në 12 biznese në Bunec dhe është dëmtuar baza ushqimore e blektorisë ne 2 familje.
Nuk ka probleme në njerëz.
Aktualisht është bërë i kalueshëm aksi i rrugës nacionale Bunec-Piqeras dhe po punohet nga strukturat e bashkisë Himarë për pastrimin e baltës. Situata po ndiqet nga prefektura Vlorë dhe strukturat e emergjencave civile të bashkisë Himarë.
Ministria e Mbrojtjes, Agjencia Kombëtare e Mbrojtjes Civile dhe Forcat e Armatosura janë përherë në gatishmëri, në ndihmë të komunitetit.
