Është zbardhur dinamika e plagosjes me armë zjarri të 15-vjeçarit nga xhaxhai i tij, Nazmi Pellumbi, ngjarje e ndodhur në fshatin Fushë Mëzez në Tiranë mbrëmjen e së enjtes (30 Janar).
Raportohet se 3 vëllezër të familjes Pëllumbi jetonin në një banesë private një katëshe në Fushë Mëzez, ku secili kishte hyrjen e tij.
Vëllezërit binjakë Florent dhe Nazmi Pëllumbi kanë pasur një konflikt për motive të dobëta me njëri-tjetrin dhe janë zënë në oborrin e banesës. Më pas kanë ndërhyrë pjesëtarë të tjerë të familjes Pëllumbi për t’i ndarë.
Në atë moment, 29-vjeçari Nazmi Pëllumbi mësohet se është futur në banesë, ka marrë automatikun dhe është kthyer në oborrin e banesës për të qëlluar drejt vëllait binjak.
Dëshmitarët kanë deklaruar në polici se i kanë parë duke i tërhequr armën njëri-tjetrit.
Ndërsa nipi i tyre 15-vjeçar (djali i vëllait tjetër) nuk ka qenë në banesë kur ndodhi konflikti.
Raportohet se adoleshenti ishte jashtë dhe kur ka dëgjuar konfliktin mes xhaxhallarëve është nisur për t’u futur brenda oborrit të shtëpisë.
Në momentin që është afruar të porta kryesore e banesës e kanë kapur plumbat. Nga pamjet e siguruara nga policia, shihej momenti kur i mituri qëllohet aksidentalisht me 3 plumba, ku një kapi në kraharor dhe dy të tjerë në krah.
Raportohet se plumbat kanë çarë llamarinën e portës dhe kanë goditur të miturin. Familja Pëllumbi nuk ka treguar të vërtetën dhe ka qenë nëna e të miturit që zbuloi konfliktin mes kunetërve.
Më pas, policia ka parë edhe shenjat e plumbave në portë, duke zbardhur kështu dinamikën e ngjarjes.
Në banesën e Florent Pëllumbit policia gjeti edhe kokainë. Vëllezërit binjakë, sipas policisë, dyshohen si shpërndarës droge dhe për këtë arsye mund te ketë pasur mosmarrëveshje dhe konflikt mes tyre.
