Kreu i PD-së, Sali Berisha ka komentuar zgjedhjet në Kosovë, duke u shprehur se votimi, administrimi i procesit dhe dalja e rezultatit ishin një model frymëzimi.
Përmes një postimi në rrjete sociale, Berisha ka uruar qytetarët, forcat politike, drejtuesit dhe të zgjedhurit e Kosovës, si dhe administruesit e procesit.
Urim pati gjithashtu edhe për partinë fituese të zgjedhjeve, Lëvizjen Vetëvendosja, me në krye Albin Kurtin.
Berisha: Kosova votoi! Kosova frymëzon!
Të dashur miq, qytetarët e Kosovës votuan dje në zgjedhjet e përgjithshme parlamentare për përfaqësuesit e tyre. Votimi, administrimi i procesit dhe dalja e rezultatit ishin një model frymëzimi.
Në zgjedhjet e djeshme, Partia e Vetëvendosjes mori 41% të votave, Partia Demokratike e Kosovës mori 22,16% të votave, Lidhja Demokratike e Kosovës mori 17,60% të votave. Koalicioni Aleanca për Ardhmërinë e Kosovës, Nisma Socialdemokrate, Konservatorët dhe Intelektualët mori 7,46%, Lista Serbe 4,43% dhe Koalicioni për Familjen 2,26%.
Me këtë rast uroj përzemërsisht qytetarët, forcat politike, drejtuesit dhe të zgjedhurit e Kosovës, si dhe administruesit e këtij procesi dinjitoz, që nderon lirinë e votës dhe demokracinë. Gjithashtu, uroj fituesin e këtyre zgjedhjeve, Lëvizjen Vetëvendosja. sb
