Komunikacioni në rrugët shtetërore po zhvillohet në kushte dimërore, nëpër rrugë të lagështa, njofton LAMM. Në aksin rrugor Kriva Pallankë -Stracin dhe Tetovë – Kodra e Diellit ka reshje të dobëta bore, të cilat për momentin nuk paraqesin pengesë për qarkullim.
Ulje e dukshmërisë për shkak të mjegullës deri në 100 metra ka në qafën malore të Strazhës dhe në Mavrovë.
Intensiteti i trafikut në rrugët jashtë zonave urbane është mesatar. Në vendkalimet kufitare në anën e RMV-së nuk ka më vonesa për hyrje dhe dalje nga vendi.
LAMM rekomandon rregullimin e shpejtësisë së lëvizjes, respektimin e sinjalistikës së komunikacionit të vendosur dhe menaxhimin e kujdesshëm të mjeteve, veçanërisht në rrugët nëpër lugina, lugina lumore dhe gryka, ku ka mundësi për rrëshqitje të dheut. Kjo veçanërisht vlen për segmentet Katllanovë – Veles, Mavrovë – Dibër – Strugë, Vinicë – Berovë dhe Koçan – Dellçevë.
