Detaje të reja janë zbuluar lidhur me operacionin e përbashkët midis SPAK, AMP dhe Policisë së Shtetit, i cili po zhvillohet që prej mbrëmjes së djeshme (28 shkurt).
Operacioni i 3 strukturave është shtrirë në disa qytete të Shqipërisë, përfshirë Tiranën, Kukësin, Fierin, Vlorën, Gjirokastrën dhe Sarandën.
GJKKO, me kërkesë të SPAK-ut, ka nënshkruar 10 masa sigurie.
Nga këto 10 masa sigurie, 4 prej tyre janë për oficerë të policisë. Nga 4 oficerët, 3 prej tyre janë arrestuar, ndërsa tjetri është shpallur në kërkim.
LEXONI EDHE: SPAK, AMP dhe Policia e Shtetit po zhvillojnë operacion të përbashkët! Raportohet për disa të arrestuar
Një prej të arrestuarve është Shkëlzen Ruska, shef i krimeve në Himarë, i cili akuzohet për kultivim kanabisi, pjesëmarrje në grup kriminal të strukturuar, shpërdorim detyre dhe veprime të tjera të kryera nga organizata kriminale.
Po ashtu, është arrestuar edhe Ervis Alisinanaj, shefi i Krimeve në Komisariatin e Lushnjes, i cili përballet me akuzat e të njëjtave vepra penale, si dhe për ushtrimin e ndikimit të paligjshëm ndaj funksionarëve të tjerë publikë.
Erdit Hazizaj është ish-oficeri i arrestuar, i cili ishte larguar nga policia në vitin 2022. Ai akuzohet për trafik droge, kultivim bimësh narkotike, dhe përfshirje në grupe kriminale.
Shefi i Komisariatit të Policisë Kufitare në Sarandë, Elvis Dërvishi, është shpallur në kërkim dhe akuzohet për “trafikim narkotikësh”, “Grup të strukturuar kriminal”, “Kryerja e veprave penale nga organizata kriminale” dhe “Shpërdorim detyre”.
Hetimet e SPAK kanë nisur prej kohësh për këta efektivë, pasi janë zbuluar lidhjet e tyre me bandat kriminale nëpërmjet aplikacioneve të koduara si Sky Ecc, ku rezulton se ata ishin të përfshirë në veprimtari kriminale që lidhen me narkotikët dhe më gjerë.
