Gazetar: Mihajllo Donev
Anëtarët e Këshillit Gjyqësor të zgjedhur nga Kuvendi kundërshtuan ashpër interpelancat e tyre, të cilat sot u votuan në Kuvend nga deputetët e shumicës. E vetmja që mbrojti qëndrimin e saj nga foltorja e Kuvendit ishte anëtarja Vesna Dameva, e cila e vlerësoi interpelancën si të paligjshme.
“Interpelanca është një instrument për kontrollin dhe mbikëqyrjen politike të Kuvendit, Qeverisë dhe mbajtësve të tjerë të funksioneve publike. Nuk ka asnjë justifikim, deputetë të respektuar, as në interpretimin e këtij instituti që mbajtësit e tjerë të funksioneve publike të jenë mbajtësit e funksioneve në gjyqësor”, deklaroi Vesna Dameva, anëtare e Këshillit Gjyqësor.
Për anëtaren Tanja Çaçarova Ilievska, interpelanca është në kundërshtim me Kushtetutën.
“Qëndrimi im është dhe pretendoj se kam të drejtë që interpelanca e një Këshilli Gjyqësor është një veprim i papranueshëm. I palejueshëm dhe në kundërshtim me Kushtetutën”, tha Tanja Çaçarova Ilievska, anëtare e Këshillit Gjyqësor.
Anëtari i këshillit Milazim Mustafa gjithashtu tha në mediat sociale se nuk ishte dakord me interpelancën.
“Ndërhyrja e pushtetit legjislativ në punën e gjyqësorit është një precedent shqetësues që prish ndarjen e pushteteve, një nga parimet bazë të demokracisë. Kjo interpelancë, e pabazë dhe e përgjithshme, nuk është vetëm një përpjekje për të më diskredituar mua personalisht dhe profesionalisht, por edhe një sulm ndaj pavarësisë së gjyqësorit në tërësi”, u shpreh Milazim Mustafa, anëtar i Këshillit Gjyqësor.
Pavarësisht interpelancës, nëse vetë anëtarët e Këshillit Gjyqësor nuk vendosin të japin dorëheqjen, ata përsëri do të qëndrojnë në pozicionet e tyre. /Alsat.mk
