Gazetar: Bashkim Sulejmani
Ka nisur debati publik për ndryshimin e emrave të rrugëve në Tetovë. Qyttarët dhe përfaqësuesit e OJQ-ve propozuan sot disa emra për rrugët e Tetovës. Kreu i Komunës Bilall Kasami tha për Alsat se nisma për ndryshimin e emrave të rrugëve është në të mirë të gjithë qytetarëve.
“Është një proces që kërkon nga gjithë ne zemërgjerësi që të pranojmë se para ndarjeve e dallimeve të shohim atë që e kemi të përbashkët, sepse përfundimisht qëllimi i këtij procesi është që Tetova si çdo qytet Evropian të ketë rrugë me emra dhe adresa banimi. Unë vlerësoj që çdo kundërshtim i këtij procesi nuk i kontribuon bashkëjetesës dhe Tetovës apo Maqedonisë pretendente për një shtet normal dhe në kushte si në Bashkësinë Evropiane”, tha Bilall Kasami, kryetar i komunës së Tetovës.
Kryetar i Komisioni për emërimin e rrugëve Argjend Veliu tha se pasi t’i kenë pranuar emrat e propozuar të njëjtat do të filtrohen, ndërsa një seancë publike me qytetarë pritet të mbahet edhe javën e ardhshme.
“Kemi pranuar propozime përmes shpalljes publike, përmes arkivit të komunës dhe qëllimi i debatit të sotëm ishte që të vazhdohet me pranimin e propozimeve, siç do jetë edhe seanca e radhës, dhe pas kësaj, këto propozime, në seancën e tretë do diskutohen veçmas dhe për të njëjtët do mbahen edhe procesverbale. Ato propozime do nxirën pastaj në listën përfundimtare dhe do i paraqiten këshillit komual për tu ndjekur procedurat Ligjore”, u shpreh Argjend Veliu, Kryetar i komisionit komunal për emrim të rrugëve.
Në Tetovë, gravitojnë gjithsej 297 rrugë nga të cilat, vetëm 81 kanë emra, ndërsa 216 duhet të marrin emër apo numër, ose të bëhet edhe ndryshimi i emrave të cilët nuk përkojnë me përbërjen etnike, e fetare të Tetovës. /Alsat.mk
