Gazetar: Miki Trajkovski
Pianistja amerikane me famë botërore, Claire Huangçi, së bashku me orkestrën e Filarmonisë së Maqedonisë, do të hapë edicionin jubilar të 65-të të “Vera e Ohrit”, që do të zhvillohet nga 12 korriku deri më 20 gusht në Ohër. Drejtori i festivalit, Gjorgji Cuckovski, njoftoi se publiku në Teatrin Antik do të përjetojë përvojë muzikore-vizuale mahnitëse, me projeksione impozante video dhe teknologji të avancuara vizuale. Ai shtoi se këtë verë në Ohër do të jetë elita botërore dhe vendore e skenës muzikore dhe dramatike, me më shumë se 300 artistë nga Europa, SHBA-ja dhe Kina.
“Do të veçoja pianistët më eminentë Mihail Pletnjov dhe Lukash Vondraçek; violinistët Vadim Gluzman dhe Jack Libeck; violonçelistin Daniel Müller-Schott si dhe kastanjete-artisten legjendare Lucero Tena në duet me harpistin bashkëkohor nga elita botërore Javier de Maestri dhe shumë të tjerë. Jam veçanërisht krenar për kuartetin e harqeve të koncertit mbretëror të Holandës dhe orkestrën “Symphonietta di Bologna”, përfaqësues të disa prej orkestrave më prestigjioze kombëtare në botë. Programi do të pasurohet gjithashtu me shfaqje për fëmijë, dy koncerte xhaz, përfshirë një performancë të artistit të njohur nga Ohrik Damjan Pejçinovski si dhe një paraqitje të Orkestrës Kombëtare të Xhazit me yllin Sean Kuti”, deklaroi Gjorgji Cuckovski, drejtor i festivalit “Vera e Ohrit”.
“Qëllimi i programit tonë muzikor është të krijojmë platformë për shkëmbim kulturor në nivel të lartë, me artistë të cilëve ‘salla më e mirë botërore’ u është shtëpia e dytë. Dëshirojmë të tregojmë vlerat tona, por edhe të dëgjojmë me interes të madh krijimtarinë e tyre”, deklaroi Simona Gjorgjeva, kryesuese e pjesës muzikore. /Alsat.mk
