Qeveria shqiptare ka shpallur datën 26 prill si ditë zie kombëtare për të nderuar ndarjen nga jeta të Papa Françeskut, i cili u nda nga jeta dy ditë më parë në moshën 88-vjeçare.
Në këtë ditë, flamuri kombëtar do të ulet në gjysmështizë në të gjitha institucionet shtetërore dhe publike të vendit.
Në vendimin e qeverisë, thuhet se shpallja e kësaj dite zie bëhet “në shenjë dhimbjeje, respekti dhe mirënjohjeje për Atin e Shenjtë, Papa Françesku, i cili ndërroi jetë pas një sëmundjeje”.
Gjithashtu, është njoftuar se të shtunën, më 26 prill, do t’i jepet lamtumira e fundit Papa Françeskut, një figurë e dashur dhe e nderuar për miliona besimtarë në mbarë botën.
Vendimi i qeverise:
Në mbështetje të nenit 100 të Kushtetutës dhe të pikës 4, të nenit 4, të ligjit nr.8926, datë 22.7.2002, “Për formën dhe përmasat e flamurit kombëtar, përmbajtjen e himnit kombëtar, formën dhe përmasat e stemës së Republikës së Shqipërisë dhe mënyrën e përdorimit të tyre”, të ndryshuar, me propozimin e Kryeministrit, Këshilli i Ministrave
V E N D O S I:
- Shpalljen ditë zie kombëtare ditën e shtunë, datë 26.4.2025, në shenjë dhimbjeje, respekti e mirënjohjeje për Atin e Shenjtë, Papa Françesku, i cili ndërroi jetë pas një sëmundjeje.
- Në të gjitha institucionet shtetërore dhe publike të ulet flamuri kombëtar në gjysmështizë.
- Ftohen të gjitha stacionet radiotelevizive, publike dhe private që gjatë ditës së zisë kombëtare të transmetojnë muzikë funebër.
- Ngarkohen të gjitha institucionet shtetërore dhe publike për zbatimin e këtij vendimi.
Ky vendim hyn në fuqi menjëherë.
