Shefja e grupit parlamentar të Nismës, Valdete Bajrami, ka konfirmuar procedimin e mocionit të mosbesimit dhe presin mbledhjen e Kryesisë së Kuvendit për shqyrtimin e këtij mocioni.
Në një konferencë të përbashkët për media, Bajrami u ka bërë thirrje deputetëve që nuk kanë nënshkruar mocionin që të votojnë për rrëzimin e Qeverisë, raporton KTV.
“Ne kemi proceduar mocionin dhe presim të mblidhet Kryesia dhe ta shqyrtojë. I falënderoj ata që kanë nënshkruar ndërsa ata që nuk kanë nënshkruar i ftoj që kur të thirret seanca të votojnë për rrëzimin e Qeverisë”, ka thënë Bajrami.
Deputetja e Lëvizjes Vetëvendosje, Aida Dërguti ka thënë se deputetët duhet të marrin vendimin e duhur në të mirë të vendit, duke e rrëzuar qeverinë e kryeministrit Isa Mustafa.
“Në këtë situatë kur kemi një qeveri të papërgjegjshme vendimi i takon kuvendit dhe në ditën kur të vijë ky mocion në seancë të marrin vendimin e duhur në të mirë të vendit”, ka thënë Dërguti.
Pal Lekaj i AAK-së në këtë konferencë për media, ka thënë se tre vjetët e fundit kanë qenë të vështira për qytetarët e Kosovës shkaku i keqqeverisjes së Mustafës.
“Kaluan tre vite të vështira për qytetarët. Tre vite të vështira për opozitën, por ky hap i sotëm demokratik i shërben vendit”, ka thënë Lekaj.
Ai është shprehur i sigurt se mocioni do të ketë sukses dhe se rrëzimi i qeverisë do të ndodhë.
“Është obligim i Kryesisë që të thërras seancën e jashtëzakonshme. I falënderoj të gjithë deputetët që kanë nënshkruar. Ne kemi përmbushur obligimin tonë. Jam i sigurt se ky mocion do të jetë sukses dhe rrëzimi i qeverisë do të ndodhë”, ka thënë Lekaj.
© KOHA.
