Kryesia dhe grupi parlamentar i Partisë Demokratike të Shqipërisë, mbrëmë diskutuan mbi organizimin e protestës së 13 majit në Tiranë, njoftojnë mediat shqiptare.
Kreu i PD-së, Lulzim Basha tha se nuk do të ketë asnjë hap që do të detyrojë opozitën, të kthehet nga vendimet e saj. Basha theksoi se PD është e hapur për dialog, por premisat për marrëveshje janë pothuajse zero.
Në lidhje me zgjedhjet e 18 qershorit, lideri i opozitës tha se PD-ja nuk ka marrë një vendim për mospjesëmarrje apo bojkot në zgjedhje.
“Zgjedhjet që do të zhvillohen më 18 qershor, janë të një koalicioni monist. Zgjedhje moniste, pa opozitën, nuk do të ketë më 18 qershor”, tha kreu i PD-së.
Para Kryesisë dhe grupit parlamentar të Partisë Demokratike, Basha vlerësoi edhe protestën që pritet të organizohet më 13 maj.
“Protesta e 13 Majit do të jetë më e madhja që ka patur Shqipëria”, tha kreu i PD-së.
