Këtë informacion Tahiri e ka konfirmuar ekskluzivisht për lajmi.net, por duke shtuar se ka qenë një takim miqësor në shënimin e Ditës Kombëtare të Francës.
Ai deklaroi se është takuar edhe me Ardian Gjinin, Shpend Ahmetin dhe politikanë tjerë.
“Po, gjatë kësaj kohe unë jam takuar me Ramush Haradinajn, Ardian Gjinin e Shpend Ahmetin, pasi kemi qenë të ftuar nga ambasada e Francës dhe kemi qenë të gjithë aty”, ka thënë Tahiri.
I pyetur për temat që janë diskutuar në këtë takim, ai ka thënë se miqësisht nuk kanë mundur t’i shmangen as tematikave aktuale, siç është krijimi i institucioneve.
“Po kemi folur miqësisht se a po bëhet Qeveria, dhe si do të formohen institucionet, pra tema aktuale”, shtoi ai për lajmi.net.
Nënkryetari i AKR-së edhe kësaj radhe nuk e mohoi dëshirën e tij që Haradinaj të bëhet kryeminsitër, por që përsëri nguli këmbë se ai do të zbatojë vendimet të cilat i merr kryesia e partisë, pra kryesia e AKR-së.
“Unë dorën në zemër e pëlqej Ramush Haradinajn, dhe dua që ai të jetë kryeministër, por unë do të zbatojë vendimet të cilat i merr partia”, tha Tahiri.
Ai ka kërkuar nga të gjitha partitë që të gjejnë në zgjidhje për krijimin e institucioneve, dhe të mos ndodhë që të shkohet në zgjedhje.
Labinot Tahiri gjithashtu theksoi se do t’i qëndroj prapa Behgjet Pacollit, pasi ishte pikërisht ai që ia hapi rrugët e politikës. /Lajmi.net/
