Drejtori i të ashtuquajturës Zyrë për Kosovën në Qeverinë e Serbisë, Marko Gjuriq, ka thënë se politikanët kosovarë nuk dëshirojnë të anëtarësohen në UNESCO apo INTERPOL nga brenga që kanë për mbrojtjen e trashëgimisë kulturore apo për luftën kundër krimit, por për ta kjo është një pjesë e procesit të forcimit të pavarësisë së shpallur njëanshëm.
Gjuriq, në një intervistë për gazetën serbe “Jedinstvo”, në konstatimin se Komiteti Ekzekutiv i INTERPOL-it ka përfshirë kërkesën e Kosovës për anëtarësim në këtë organizatë, ka thënë se ai person i cili është i vendosur për të luftuar për një kauzë të drejtë, gjithmonë ka hapësirë për manovrim, “dhe se angazhimi ynë është i padiskutueshëm”, transmeton Koha.net.
Ndërkaq, në lidhje me qëllimin e Kosovës për t’u bërë anëtare e UNESCO-s, Gjuriq thotë se argumentet e Serbisë “janë të lidhura me ruajtjen e trashëgimisë kulturore serbe në Kosovë e Metohi”.
Tutje, ai thotë se politikanët në Kosovë, anëtarësimin në organizata ndërkombëtare e dëshirojnë për të forcuar shpalljen e njëanshme të pavarësisë dhe shpreh keqardhje që shumë organizatave nuk u pengojnë përpjekjet e tilla të instrumentalizmit politik të këtyre organizatave të rëndësishme ndërkombëtare.
Gjuriq thotë po ashtu se modalitetet e zgjidhjes së çështjes së Kosovës do të kenë pasoja për tërë popullin dhe qytetarët serbë, për çka, sipas tij, duhet të përfshihen në dialog të gjithë segmentet shoqërore.
