Kuvendi i Kosovës sot ka proceduar pa rezultat me vazhdimin e seancës konstituive, të filluar që nga 3 gushti, por nuk ka arritur sërish të zgjedhë kryetarin dhe nënkryetarët e këtij institucioni.
Kryesuesi po zotohet se më nuk do të thërrasë seancë me ftesë të koalicionit PAN.
Thotë se vetëm VV’ja e LAA’ja mund të propozojnë datën për caktimin e vazhdimit të seancës për kosnituimin e Kuvendit
Zyrtarë të koalicionit PAN kanë deklaruar që nuk i kanë numrat.
Ndërkohë që ka qenë vetë prijësi i këtij koalicioni dhe kandidati për kryeparlamentar nga koalicioni PAN, Kadri Veseli, ai i cili e ka ftuar Lëvizjen Vetëvendosje që t’i bëjë numrat për kryeparlamentar dhe ta dërgojë në Kuvend për votim.
Kryesuesi i Kuvendit të Kosovës, deputeti më i vjetër, Adem Mikullovci, po zotohet se më nuk do të procedojë datë për vazhdimin e seancës konstituive edhe nëse PAN e kërkon këtë gjë.
Mikullovci theksoi për Gazetën Express, se duhet të mbledhen partitë dhe të diskutojnë për koalicione të reja, në mënyrë që ai ta thërrasë seancën e re. Thotë se përveç tij, askush nuk mund të thërrasë seancë konstituive.
“Nuk ka të drejtë askush pos meje të thërras seancë. Unë nuk thërras seancë deri sa partitë të mblidhen e të diskutojnë si dhe të bëhen koalicionet e reja, prishjet, dhe të bëhen gati për ta vazhduar seancën”, ka thënë ai.
Mikullovci tutje theksoi, se menjëherë pas përfundimit të seancës, është mbledhur kryesia e Lëvizjes Vetëvendosje, për të gjetur zgjidhje rreth sigurimit të 61 deputetëve për ta proceduar në Kuvend, emrin e kandidatit nga ky subjekt për krye parlamentar.
“ Unë i kam thënë VV’së se ata patën mbledhje, dhe unë isha pjesë e kryesisë, ata tash po mundohen pasi Kadri Veseli tha bëni 61 votë dhe Kuvendi është i juaji. Ata tash po mundohen që t’i bëjnë numrat. Kur t’i bëjnë numrat e të thërrasin seancë. Unë kur të merrem vesh vetëm më VV’në dhe ata që bëjnë koalicion. Nuk e di se me kë po dëshiron të bëjë VV’ja koalicion”, ka sqaruar Mikullovci.
E ndërkohë pas deklarimeve të koalicionit PAN se nuk i kanë numrat, si dhe polemikat në mes të këtij të fundit dhe zyrtarëve të VV’së, kryesuesi i saj, deputeti Adem Mikullovci e ndërpreu atë, duke thënë se do t’i njoftojë me kohë deputetët për vazhdimin e saj.
