Kryeministri i Kosovës, Ramush Haradinaj, në mbledhjen e qeverisë, iu ka kërkuar ministrave të tij, që t’i angazhojnë zëvendësministrat në punë konkrete.
Ai ka thënë se zëvendësministrave duhet t’iu delegohen punët dhe përgjegjësitë që i kanë.
Sipas Haradinajt, të gjithë zëvendësministrat duhet t’i dinë obligimet dhe të ketë mundësi të arsyetojë angazhimin e tij.
Shefi i qeverisë ka paralajmëruar se në rast se zëvendësministrat nuk e arsyetojnë besimin që u është dhënë do ta shqyrtojnë tërheqjen e këtij besimi.
Qeveria Haradinaj mban rekordin e zëvendësministrave deri më tani. Nga të gjitha qeveritë, një ministër i ka pasur 2 deri në 3 zëvendësministra. Në qeverinë Haradinaj çdo ministër i ka 4 deri 5 zëvendësministra, e që numri i tyre kalon mbi 60, që është një rekord në historinë e Kosovës.
