Presidenti Hashim Thaçi thotë se e ka mirëpritur vendimin e Qeverisë për dërgimin e marrëveshjes së Demarkacionit në Kuvend.
Ndërsa lidhur me raportin e prezantuar nga komisioni i kryesuar nga Shpejtim Bulliqi, presidenti thotë se nuk pati asnjë provë se kufiri është ndryshe nga ajo që vetë i pari i shtetit e kishte nënshkruar ne vitin 2015.
Sot komisioni për rishikimin e shënjimit të kufirit me Malin e Zi prezantoi të gjeturat e tij, ndërsa menjëherë pas kësaj, qeveria në krye me Ramush Haradinajn miratuan vendimin për dërgimin e marrëveshjes se Demarkacionit si dhe raportin e ri në Kuvend.
Për këtë presidenti Thaci shprehet i kënaqur.
“Dua të besoj në vullnetin politik dhe shtetëror të përfaqësuesve të zgjedhur të qytetarëve, por njëkohësisht ftoj të gjithë deputetët e Kuvendit të Republikës së Kosovës, pavarësisht përkatësisë partiake të tyre, që të jenë të bashkuar në ratifikimin e kësaj marrëveshjeje ndër-shtetërore”, ka shkruar ndër të tjera Thaçi në profilin e tij zyrtar në rrjetin social “Facebook”.
Postimi i plotë i presidentit Thaçi:
E mirëpres dhe përgëzoj Qeverinë e Republikës së Kosovës për vendimin e sotëm për ta proceduar për ratifikim në Kuvendin e Republikës së Kosovës marrëveshjen për shënimin e vijës kufitare ndërmjet Republikës së Kosovës dhe Malit të Zi.
Dua të besoj në vullnetin politik dhe shtetëror të përfaqësuesve të zgjedhur të qytetarëve, por njëkohësisht ftoj të gjithë deputetët e Kuvendit të Republikës së Kosovës, pavarësisht përkatësisë partiake të tyre, që të jenë të bashkuar në ratifikimin e kësaj marrëveshjeje ndër-shtetërore.
Ratifikimi i marrëveshjes për shënimin e vijës kufitare ndërmjet Republikës së Kosovës dhe Malit të Zi i jep fund izolimit të vendit tonë, duke mundësuar heqjen e regjimit të vizave, por edhe e forcon subjektivitetin ndërkombëtar të shtetit tonë.
Me vendimin e sotëm të Qeverisë, merr fund saga e debateve shterpe akademike, e cila duke mos sjellë asnjë argument të ri, për tri vite me radhë ka prolonguar izolimin e qytetarëve të vendit, duke shkaktuar konfuzion dhe frikë se kinse Kosova rrezikon të humbet territor.
Tani është koha që Kuvendi i Republikës së Kosovës të marrë vendimin e vet meritor në interes të qytetarëve të vendit, të cilët me durim të pashembullt janë duke pritur me vite të tëra heqjen e vizave, respektivisht heqjen e izolimit. HTH
