“Ndjehem jashtëzakonisht keq për ata që kam bërë”, ka thënë hakeri kosovar, Ardit Ferizi, që i siguroi të dhëna ISIS-it për mbi 1000 punonjës të ushtrisë e qeverisë amerikan, njofton Klan Kosova.
The Bulletin duke cituar Associated Press ka shkruar një artikull duke përshkruar situatën brenda sallës së gjyqit ku Ferizi mori dënimin prej 20 vjetëve burgim në Aleksandri të Virgjinjas në Shtetet e Bashkuara të Amerikës.
Prokurori kishte kërkuar dënim maksimal prej 25 vjetëve për hakerin, por Elizabeth Mullin, avokatja e caktuar nga shteti amerikan për Ferizin, tha se ai nuk duhet të dënohem më shumë se gjashtë vjet, sepse gabimet e tij ishin të paqëllimshme.
“Ai ishte një tinejxher pa qëllime të këqija dhe i drejtuar gabimisht i cili nuk e dinte se ç’po bënte”, ka thënë ajo.
“Ai kurrë nuk ka qenë përkrahës i ideologjisë së ISIS-it”.
Ferizi, që tani është 20 vjeçar, është njeriu i parë në SHBA që dënohet njëkohësisht për terrorizëm dhe hakim.
Ai u arrestua vitin e kaluar në Malajzi, ku kishte shkuar për studime, ndërsa ka pranuar se kishte hakuar emrat e mbi 1000 personave duke u marrë atyre të dhëna për identitetin.
Të premten, ditën që mori dënimin prej dy dekadash, Ferizi kishte probleme të shpjegonte atë që kishte bërë dhe përse e kishte bërë, kur iu kërkua një shpjegim nga gjyqtarja amerikane Leonie Brinkema.
Ai tha se gjithçka kishte ndodhur shumë shpejt.
“Ndjehem kaq keq për atë që kam bërë. Më vjen shumë keq që i kam bërë njerëzit të ndjehen të frikësuar”, deklaroi Ferizi.
Ndërsa prokurori i rastit Brandon Van Grack tha se Ferizi duhet të marrë 25 vjet dënim, sepse ka vënë në rrezik jetën e rreth 1300 shtetasve amerikanë.
Gjykata ka lexuar edhe një letër të familjes Ferizi, ku thuhej se Arditi kishte një jetë të vështirë.
Sipas letrës, axha i Arditit ishte vrarë dhe babai i tij ishte kidnapuar gjatë luftës së fundit në Kosovë, njofton Klan Kosova.
