28 Nëntori 2017 shënoi çeljen e Vitit Mbarëkombëtar të Gjergj Kastrioti Skënderbeut, vit i cili do të kremtojë veprën e heroit deri më 28 Nëntor 2018.
Shqipëria përkujton Heroin Kombëtar, në 550-vjetorin e vdekjes së tij, atë që më shumë se kushdo mishëron përpjekjen për mbrojtjen e lirisë dhe të mëvetësisë së vendit.
Si një vlerësim ndaj veprës së Heroit tonë Kombëtar, Banka e Shqipërisë ia kushton kalendarin e vitit 2018, figurës së Gjergj Kastrioti Skënderbeut dhe pranisë së tij në monedhën dhe kartëmonedhën shqiptare.
Ai është natyrshëm personaliteti më i hasur në emetimet shqiptare, duke e shoqëruar monedhën kombëtare në rrugëtimin e saj thuajse 100-vjeçar.
Faqja e muajit janar paraqet bustin e Heroit Kombëtar me përkrenare, në profil djathtas, detaj i marrë nga monedha 20 Franga Ari, emetim i vitit 1926. /Sakte.net
